عربية حمادي تعلق على إيقاف مريم الدباغ

علقت  مساء أمس الأحد 7 ماي الجاري الإعلامية عربية حمادي على  إيقاف الانستغراموز مريم الدباغ في مطار تونس قرطاج بسبب شكايات دون رصيد .

و في هذا السياق نشرت عربية تدوينة جاءت كالتالي :

''نهارة إلّي قابلتها لأوّل و آخر  مرّة في حياتي  في برنامج بوليميك ما سلّمتش عليها في الكواليس و ما نافقتهاش و ما حسستهاش بالأمان باش بعدها نغدرها في البلاتو لأنّو مش من طبعي بالعكس خزرتلها بطريقة تخلّيها تتأكّد إنّي داخلة  للبلاتو و مش باش نرحمها....

كلّمني مذيع البرنامج قبل الحلقة بليلة باش يقلّي راهي غدوة ضيفتنا و تناقشنا شويّة و كان عندي خيار بين إنّي نحضر للحلقة و بين إنّي نعتذر و للأمانة  كان متفهّم جدّا لموقفي منها و قلّي ليك مطلق الحرّية قلت كان ما حضرتش باش يقولو خافت منها و ما حبّتش تواجهها و كان حضرت و عملت إلّي في مخّي فمّا شكون باش يقول عاملين سيناريو وهاي تعدّت السّنوات و كيما قلت وقتها أقسم بالله العليّ العظيم إنّو إلّي صار وقتها في البلاتو لاكان حدّ في بالو بيه لا مذيع البرنامج ولا أي شخص ليه علاقة بالبرنامج و النّاس الكلّ تفاجأت و لو ترجع الأيّام نعاود نعمل نفس الشّي اليوم الطّفلة توقّفت و الكلّ ولّت أبطال و تسبّ فيها أنا بيني و بينها قضيّة تحكمت فيها بالحبس إبتدائيا ب3شهور بعد ما غلطت في حقّي و حقّ زوجي في أحد البرامج التّلفزيّة و قامت هي بإستئناف الحكم و الجلسة تعيّنت نهار 30 ماي و ما نعرفش شنوّا ممكن يتحكم فيها "فقد أسقط حقّي إن حُكم لصالحي" و من هنا لهاكا الوقت نحبّ نقول إنّي ضدّ الشّماتة فيها أو سبّانها أنا مشكلتي معاها كان فرضانها علينا في وسائل الإعلام و كيف خرجت من الإعلام ماعادش يهمّني الباقي حياتها و أمورها و أنستغرامها و بدنها وهي حرّة''

Dans la même catégorie