Publié le 08-07-2025
شنوّة معناها قرار ترامب بفرض 25% معاليم ديوانية على تونس؟
نهار الإثنين، الرئيس الأمريكي دونالد ترامب أعلن إنه بلاده باش تفرض بداية من 1 أوت 2025، معاليم ديوانية (رسوم جمركية) بنسبة 25% على السلع اللي تدخل من تونس لأمريكا.
شنوّا يعني هذا؟، يعني أي منتوج تونسي باش يتصدّر للسوق الأمريكية، الدولة الأمريكية باش تفرض عليه ضريبة إضافية بنسبة 25%، وهو ما يعني إنه المنتوجات التونسية تولّي أغلى في السوق الأمريكية، وبطبيعة الحال، هذا ينجم يأثّر على الصادرات التونسية، ويقلّص من فرص البيع في أمريكا.
علاش ترامب يعمل في هكا؟
ترامب، من وقت حملتهو الانتخابية وهو يدفع في سياسة يسمّيها "أمريكا أوّلاً"، ويحبّ يحدّ من التوريد (الاستيراد) ويشجّع الصناعات المحلية. وفي أفريل اللي فات، أعلن على سلسلة من المعاليم الجمركية على دول من العالم الكل بنسب مختلفة. مثلاً، اليابان 24%، كوريا الجنوبية 25%، وميانمار 40%... وتونس جات من بين الدول اللي باش يدفعو 25%.
شنوّة تأثير القرار على تونس؟
على المصدرين:الشركات التونسية اللي تصدّر لأمريكا تنجم تخسر السوق، خاطر المنتوج متاعها باش يولّي أغلى وماعادش ينجّم ينافس.
على التشغيل:إذا الطلب على السلع التونسية نقص، هذا ينجم يأثّر على مواطن الشغل في القطاعات المصدّرة.
على الاقتصاد:أي نقص في التصدير يعني نقص في المداخيل بالعملة الصعبة، وهذا يأثّر سلبًا على الاقتصاد.
