كيفاش تقرا كشف الحساب البنكي (Relevé de compte) وتفهم وين ماشية فلوسك؟

 بش برشة منّا، كي يوصلهم كشف الحساب البنكي(Relevé de compte) كل شهر، يغزرو للورقة ويبان لهم الشيء معقد وفيه برشة أرقام وكلمات بالفرنسية والعربية. برشة يكتفيو فقط بالنظر للرصيد الإجمالي(Le solde) من غير ما يثبتوا في التفاصيل.

لكن في الواقع، كشف الحساب هو وثيقة أساسية يوفرها البنك للحريف باش يلقى فيها تفاصيل العمليات الكل اللي صارت على حسابو البنكي. فهم هذه الوثيقة يخليك تتحكم في ميزانيتك وتعرف وين ماشية فلوسك بالضبط.

بناءً على دليل"أموري المالية"، كشف الحساب البنكي يتجزء عادة لـ3 أجزاء رئيسية، تعالوا نشوفوهم مع بعضنا بالتفصيل:

1:معطيات الحساب والـClient معلومات الهوية البنكية

هذا الجزء الفوقاني من الورقة وهو بمثابة بطاقة التعريف الخاصة بحسابك. المعطيات هذه تجم تختلف من بنك لآخر، أما في العادة تلقى فيها على الأقل:

• اسم البنك وشعارو

• اسم الحريف وعنوانو:الاسم الكامل متاعك والعنوان البريدي المسجل لدى البنك، بالإضافة إلى معرف العميل(Identifiant client).

• المعطيات الخاصة بالحساب:اسم الفرع البنكي(Agence) اللي حليت فيه حسابك.

• رقم الحساب(N° de compte).

• العملة(Devise): بالدينار التونسي(TND) أو بالعملة الأجنبية كاليورو للمقيمين بالخارج.

• الـRIB:رقم التعريف البنكي المتكون من 20 رقم، وهو اللي تستعملو باش تصب أو تتلقى فلوس داخل تونس.

• الـIBAN:رقم التعريف الدولي لحسابك، وتستحقو خاصة في التحويلات الدولية.

• تاريخ إيقاف كشف الحساب وعدد الصفحات:باش تتأكد اللي المطبوعة كاملة ومش ناقصة أوراق.

2: تفاصيل العمليات اللي صارت على الحساب:أهم جزء يلزمك تثبت فيه عملية بعملية:

• الرصيد الأولي(Solde au début de la période):هو قداش كان عندك فلوس في حسابك في بداية الفترة (المهلة اللي يغطيها الكشف).

• جدول العمليات:وتلقى فيه تاريخ كل عملية(Date)، ووصفها(Libellé de l'opération) كيف "دفع بالبطاقة في مغازة"، "سحب من الموزع الآلي"، أو "تحويل وارد من حريف".

• الفرق بين الـDébit والـCrédit مهم جداً:

• الـDébit:يعني فلوس خرجت من حسابك (قاعد تنقص من رصيدك)، كيف المصاريف، الأداءات البنكية، وقصان القروض.

• الـCrédit:يعني فلوس دخلت لحسابك (قاعد تزيد في رصيدك)، كيف الشهرية، صبّان فلوس، أو تحويل واصلك.

• تاريخ القيمة(Date de valeur):وهو التاريخ الفعلي اللي البنك يحسب فيه الفائدة أو يقص فيه الفلوس، وساعات يختلف بنهار أو اثنين على تاريخ العملية بيدها.

• الرصيد في آخر الفترة(Solde à la fin de la période):هو المبلغ المتبقي في حسابك بعد حساب مجموع الـDébit والـCrédit.

3: معلومات إضافية وحقوقك القانونية

في آخر كشف الحساب (أسفل الورقة)، يلقى الحريف معلومات قانونية وإدارية مهمة برشة لحمايتو، ومنها:

• ضمان الودائع:ملاحظة تؤكد إنو حسابك داخل في منظومة "صندوق ضمان الودائع البنكية"، وذالك حسب القوانين والأنظمة المعمول بها في تونس لحماية فلوس الحرفاء.

• بيانات التواصل للمطالب والشكايات:في صورة وجود خطأ أو مصلحة تحب تتصل بيها(Centre Relation Client).

• معلومات الاتصال بالوسيط البنكي(Médiateur bancaire):وهو الشخص المستقل اللي تجم تتصل بيه إذا صارلك خلاف مع البنك وما لقيتش معاه حل ودي.

• عنوان المقر الاجتماعي للبنكوكل المؤشرات القانونية (الرقم الجبائي، رأس المال، إلخ).

في نفس السياق