2021-06-29 نشرت في
معز بن غربية: إخواتنا الكناطرية ما تخليوهاش بينا كيما عملوا هوما
دعا الإعلامي معز بن غربية بطريقة نقدية "خواتنا الكناطرية ما تخليوهاش بينا كيما عملوا هوما يرحم والديكم. الشدّة فيكم وفي ربّي".
وقال الإعلامي في تدوينة على صفحته موجها كلامه إليهم "إنتم الي عمركم لا خليتوها بينا، في العيد الكبير تجيبولناالعلالش من الجزائر باش الزوالي يعيّد كيما الناس الكل؛ وقت العرس تجيبولنا التلفزة والفريجيدار والكليماتيزور وجهاز العروسة؛ تاقفو حتى مع اللي لا باس عليهم وتوصّلولهم الشكلاطة السويسرية والجبن الفرنساوي!
يا اللي عمركم ما قصرتو في حقنا، كي الدولة تغلّي علينا الدخان، تتغششو وتجيبوهولنا أرخص بـ3 مرات.
انتوما الي حتى المازوط توفروهولنا بنصف سومو وبجودة عالية. انتوما الي حتى دول شقيقة عاونتوها، بعتولها الماء والمقرونة والزيت والدواء وحتى الجعة الوطنية الممتازة".!
وتابع بن غربية"اليوم مستحقينلكم أكثر من أي وقت، حاجتنا بزوز ملاين جرعة تلقيح، من المستحسن يكونpfizer،و 2000 جهاز تنفس اصطناعي، و500 سرير إنعاش.
خواتنا الكناطرية، ما تخليوهاش بينا كيما عملو هوما يرحم والديكم. الشدّة فيكم وفي ربّي".
