إلغاء عرض رؤوف ماهر في مهرجان المنستير يثير الجدل: الفنان يردّ برسالة شديدة اللهجة

وجه الفنان رؤوف ماهر رسالة إلى مدير مهرجان المنستير الدولي على إثر إلغاء عرضه في الدورة الحالية، للتعبير عن استيائه من هذا القرار الذي جاء إثر اعتذار رؤوف ماهر عن تقديم عرضه بسبب وفاة أحد أعضاء فرقته الموسيقية، ورفض مدير المهرجان التأجيل.

وقال رؤوف ماهر في رسالته المنشورة على صفحته"سيدي الكريم، احنا بشر كيفك ... نحزنوا ونفرحوا، ونتعبوا ونمرضوا، وعندنا مشاعر وناس نعزّوهم في قلوبنا كي خوتنا . والفنان موش آلة تدخل للركح وقت ما يُطلب منها وتخرج.

اليوم فقدنا واحد من خوتنا في الفرقة، زميل عاش معانا التعب والفرحة، وكان باش يشاركنا في إنجاح عرضكم. وإحنا في صدمة ونبكيو على فقيدنا، طلبنا فقط تأجيل العرض يوم ولا يومين، لكن الردّ كان: «الفقيد موش من عايلتكم (بمعنى موش من دمو )، ونجمو نجيبو عازف آخر»، يا إمّا العرض يصير يا إمّا يتلغى."

وتابع قائلا" يا سي المدير : المهرجان يتعطّل بالمطر، وصارت قبل، وشكون يتحمّل مسؤولية التأجيل وقتها؟ أمّا وفاة إنسان عزيز علينا، المطلوب منّا نتجاوزوها في أقل من ساعة وكأنّ شيئًا لم يكن؟

الفلوس تتعوّض، والحفلات تتأجّل، و اختتام المهرجانات تتعاود… أمّا اختتام الإنسان إذا مشى، ما يرجعش. والأوجع من القرار إنّو ما وصلتناش حتى كلمة تعزية أو مواساة.

وجمهورنا العزيز في المنستير، نعرفكم أهل فهم وتقدير، ونعتذر منكم على وضع خارج عن إرادتنا. أنا نتشرف بيكم الكل و نجيكم في أي وقت وأي مكان تحبّوا."

وختم بالقول" يا سيدي الكريم راهو الفنان إنسان قبل كل شيء. وقيمتنا وكرامتنا ومشاعرنا أغلى من أي مهرجان في العالم وأي مسؤول" وفق تعبيره.

في نفس السياق