وزير سابق يحلل ما يحدث في حزب حركة النهضة

علق الوزير السابق فوزي عبدالرحمان على ما يحدث في الساحة السياسية منذ 25 جويلية ناقداً بشدة حزب حركة النهضة.
 

في هذا الإطار ، قال عبدالرحمان : " ما هو في بالكم اللي ثما كيما الأزمة في حزب النهضة.. إي أزمة و برّا و تتعدى كيف البرودا حاشاكم.. شويا تجميد مجلس نواب و رفع حصانة عليهم و شويا قضايا هوكا ما بين محكمة المحاسبات شويا فلوس.. على حكاية إغتيالات و في الثنية تي هاك الحكاية متاع الجهاز السري.. مع شويا قضايا من هنا و من غادي و آش باش يجيب البحث.. . تي حاصيلو.. أزمة و برّا..
تي ماهو و في بالكم اللي الحزب عين سي محمد القوماني مسؤول على الخلية متاع الأزمة..
شوفو آش يكتب سي القوماني في صفحتو.. قال لا للعودة الي الوراء.. شعار المرحلة عند الرئيس ولا شعار النهضة.. حلف و قال و الله لا صارها كان نرجعو التالي.. باهيش توّا ؟ لا مجلس و لا رئيس مجلس و لا حكومة.. الفائدة الرجوع لا.. اعملو اللي تحبو. الرجوع للوراء لا.. نثبتو في حاجة صغيرة تي ماهو جماعة عبير الرجوع لا معانا؟
و البيان اللي على صفحة سي المكلف بخلية الأزمة هذاكا ما قال حد لحد.. قالك احنا باش ننخرطو في الجهد الوطني ضد الفاسدين الكل و باش نتبعو المال الفاسد.. متاع السياسة.. عرفتوه انتوما المال الفاسد اللي يحكيو عليه؟ على خاطر انا برجولية ما عرفتش آش يقصدو و زعما على شكون يحكيو؟
يكونش على هاك السيد اللي هاك العام شدوه في باريس مطار أورلي في فرنسا و جاي من الخليج و عندو مرشانة لا نودك لا نشهيك.. و من بعد ذاب كيف الملح.. (موش متاع الآخرين) .. و إلا زعما على هاك الليستة متاع تقريب 50 قياديين من حزب النهضة طلبت محكمة المحاسبات حساباتهم في البانكة.. حتى بالأمارة تخيلنا الخبر تقولش عليه حلمة و تعدات من غادي لغادي.. حاصيلو.. البيان متاع النهضة انا شخصيا باش نعملو كواترو.. باش نوريه للأخوة في العالم العربي اللي مازالو يشكو في حكاية الإسلام السياسي و الديمقراطية.. ما نعرفش علاش تفكرت الليلة هاك الكلمات متاع الباجي الله يسامحو. و باش ما نطولش عليكم ما نيش باش نعلق على الدولة قبل الأ. حزاب و حكاية إستقلال القضاء.. يلزمني 135 صفحة.. تقريب.. و موش وقتو.. الليلة..
باهي برجولية آش قولكم في المكلف بالازمة و كيفاش واخذ الأمور؟ موش خير من الهاروني بربي؟؟ عرفتوه متاع مجلس الشورى؟ اللي توحشنا اجتماعاتو.." 

في نفس السياق