هكذا تحدث أمني عن الرئيس الباجي قائد السبسي

نشرت نقابة موظفي الإدارة العامة لوحدات التدخل على صفحتها على شبكة التواصل الاجتماعي شهادة أمني عمل في الفريق الأمني للرئيس الراحل الباجي قائد السبسي.

وقد جاء في الشهادة التي دوّنت باللهجة العامية "نتذكر مرة خذيت أيامات راحة ، دوب ما رجعت و شافني قلي وين كنت إنت سي الشباب ؟؟؟ قتلو خذيت أيامات راحة سي الباجي ، قلي أنا عندي 3 سنين مارتحتش حتى نهار ، كاينو وقتها تذكر انو هو عندو برشة مارتاحش كان هذا في صيف 2014 ، حسيت كاينو توجع الي ماهوش عاطي حق روحو ، حق راحتو ، حق بدنو عليه ، حق الكبر وانا ذكرتو بالشي هذا ".
وتابع قوله" ترجع بيا الذكريات لبرشة سنين التالي ، ذكريات متع تعب مالخدمة معاه ، تعب يتنحى كي نوصلو لدارو ، نقللو سي الباجي راو لولاد (لولاد نسبة للمرافقين الامنيين )تعبو اليوم بعد نهار كامل في حملتو الانتخابية ( نبدى طامع بش يقلي غدوة مانيش خارج مالدار مانغير ماتجيوني ) يتلفتلي و يقلي انا الحمد لله لاباس عليا اما تونس ماهيش لاباس ، يلزمنا نتعبو على خاطر تونس بش تولي لاباس
و تعبنا على خاطر تونس ، و تعب هو معانا و تعبت ناس اخرى ، بش وصل هو للحكم، الي يرى الي هو مانجم يعمل شي لتونس ، شكون يضمنلي الي غيرو في الوقت اذاكة كان ينجم يعمل حاجة ماخير 
الخدمة معاه كان طعم آخر ، خليط متع جدية و ضحك و انضباط و إستهتار وتضحية وراحة و تعب ، كلمتو ديما حاضرة ، روحو خفيفة كان يقدر ياسر الأمنيين الكل و كان أي حد يعرض عليه أي برنامج متع تنقل يقلهم أنا مانيش ملك روحي ، شوفو مع جماعة الأمن متاعي هم إلي يقرروا، كان قلنا إحنا أيا ، يمشي بدون تحفظ ، و كان قلنا لا مايسالش علاش 
يبدى في تمبك إجتماع ، سواء شعبي ولا في الحزب ، نمشيلو نطبس عليه في وذنو نقلو سي الباجي لازمنا نغادرروا ، لا يسأل علاش لا كيفاش ، يدور يقلهم أيا بخاطركم يا جماعة و يغادر ".
وأضاف الأمني"بش نكون صادق و أمين مع نفسي و مع روحي . البارح كي سمعت بوفاتو تأثرت تأثر عادي بحكم عندي 5 سنين ملي كملت مهمتي معاه ، أما توة و أنا نسترجع في ذكرياتي معاه ، دموعي هبطت و حسيت بغصة ، تالمون كنت نحسو قوي و ذكي و داهية كنت نقول حتى كي يجي بش يموت لازم يلقى صيغة بش يمنع مالموت ( استغفر الله ) تمنيت كان عاودت قابلتك سي الباجي و نشوف ضحكتك كي تفرح و تراني و ساعات تتبولد عليا و لا على شعري كيفاش نمشطو أما الله غالب شهوتي بش تقعدلي في قلبي لآخر العمر...." حسب قوله.

في نفس السياق