Publié le 04-11-2022
''ذو دريمر: ''باش نحاول مع اليوتوب نرجعوا القناة الوطنية
أكد صانع المحتوى ربيع بن ابراهيم المعروف بـThe Dreamer أنه سيتواصل مع موقع يوتيوب قصد إجاد حل لعودة حساب القناة الوطنية.
وقال صنع المحتوي في تدوينة له: "المساج اليوم وصل للتوانسة الكل لذا باش نحاول مع اليوتوب نرجعوا القناة الوطنية، ولو أنو المسؤولين حسب تصريحاتهم خذاوا الموضوع شخصي عوضا عن تحمل المسؤولية بالإعتذار و اتخاذ قرار بعدم استغلال أعمال الفنانين دون موافقتهم في المستقبل".
وجاء ايضا في نص التدوينة:
"أولا حبيت نشكركم الناس الكل على وقفتكم العزيزة و محبتكم ليا و لتونس، أحلامنا و أمنياتنا ما تبعدش على بعضها، لكلنا نحبوا نشوفوا بلادنا خير و نخدموها و نقدموا بيها.
الأمور ما لازمهاش تخرج عن سياقها
تزامن الحادثتين الأخرانين ما يعنيش بالضرورة إنهم مترابطين، والموضوع ما يلزمش ناخذوه شخصي.
بالعكس الهدف إنو نحسنوا و نسهلوا على بعضنا.
بالنسبة لمشكل ال copyright
موش كان أنا تهزت خدمتي و استعملوها من غير ذكر المصدر و تعمد إخفاء الهوية وكيف تطلب حقك يقولولك ما انجموش نخلصوك مثال صغير: كيف تتفرج في مسلسل على اليوتوب تلاحظ إنو الموسيقى يقع حذفها وقتها تفهم إلي صار تعدي على حقوق الفنانين، نشوفوا زادا برشا مصورين يتشكاوا من إستعمال صورهم بدون إذنهم، وهذا يصير مع مصممي برمجيات و مصممي أزياء و الرسامين و المخرجين وغيرو، هي الفكرة في حد ذاتها لازم تكون محمية، إلي صار اليوم ينجم يكون حملة تحسيسية باش نفهموا حقوق التأليف ونعطيوا الناس حقها و ما نهضموهاش في تعبها و عرقها، وفرصة باش نخمموا نتعاونوا معاهم ونعاونوهم يواصلوا و يطوروا أعمالهم.
بالنسبة لحجز معدات التصوير:
نتفهم اجراءات السلامة و تطبيق القانون في ما يخص التراخيص و غيرو، ولكن إلي صعيب نفهمو هو الوقت إلي تاخذو الإجراءات هذي و التعطيلات المنجرة عليه، كيف تحجز معدات لمدة شهر أو أكثر، كيفاش باش نخدم؟ منين باش نخلص الناس و الكراء و المعاليم القارة متاع الشركة؟ كيفاش انجم نحترم مواعيد الإنجاز؟ تعرف آش معنتها شركة مسكرة شهر كامل؟ خسارة لينا و للدولة بما أننا نخلصوا في أداءات، ما عندناش شهرية قارة توصلنا كل آخر شهر. (في حالتي أنا ما كان فما حتى داعي لحجز معداتي بعد ما استظهرت بجميع الأوراق اللازمة التثبت كان ياخذ دقائق فقط)
والتراخيص علاش تاخذ من 6 أسابيع لستة أشهر؟ علما وأن مدة صلوحيتها لا يتجاوز شهر واحد، علاش لازمك تجري من إدارة لإدارة و من وزارة لوزارة باش تفهم وين التعطيل، علاش موش كل شي على منصة رقمية؟
هذا الكل كوم و إقتناء المعدات بالعملة الصعبة مالخارج و الإجراءات الديوانية كوم آخر خاصة كيف تحلم باش تنافس على مستوى عالمي، معدات أحدث و أرخص و يتحصلوا عليها في وقت أقل برشا و الحصول على التراخيص سريع دون التهاون في شروط السلامة.
المساج اليوم وصل للتوانسة الكل لذا باش نحاول مع اليوتوب نرجعوا القناة الوطنية، ولو أنو المسؤولين حسب تصريحاتهم خذاوا الموضوع شخصي عوضا عن تحمل المسؤولية بالإعتذار و اتخاذ قرار بعدم استغلال أعمال الفنانين دون موافقتهم في المستقبل.
نشاء الله تتصلح الأمور و نراجعوا رواحنا و نحطوا اليد في اليد الناس الكل باش نصلحوا ونقدموا".
