فوزي عبد الرحمان:ما زلنا ما تفاهمناش على أي منوال تنمية نحبو

قال وزير التشغيل والتكوين المهني السابقفوزي عبد الرحمان ،إن منوال تنمية ما هوش منوال نمو.. ما هوش اقتصاد فقط هو يمس التونسي في خدمتو و تعليمه و صحته و عيشتو مع الأخرين. و هذاكا الفرق بين تنمية و نمو.

و اضاف عبد الرحمان في تدوينة على صفحته الرسمية ،أن منوال تنمية هو كيفاش نخلقو الثروة و كيفاش خاصة تولي تنمية.. النمو يمس الاقتصاد و التنمية تمس الانسان.
منوال تنمية هو كيفاش تونس تاخذ بلاصتها في العالم و كيفاش تدافع عليها و تكبرها و تطورها.. في العالم متاع اليوم و العالم متاع غدوا.
منوال التنمية هو استراتيجية للصناعة تخلق الثروة و التنمية
منوال تنمية هو بناء بحث علمي حقيقي في ميادين نختاروها
منوال التنمية هو التنمية البشرية و هو انتاج الكفاءات الي باش تخلق الثروة و باش تسير البلاد
منوال تنمية هو كيفاش يتنخى الفقر من البلاد و كيفاش تنقص الهشاشة الاجتماعية و كيفاش يتنحى الاحساس بالتهميش
منوال التنمية يهم مسألة الملكية و إصلاحها في سبيل خلق الثروة.
منوال التنمية هو كيفاش نحدو من المستوى غير المقبول في التفاوت.. اللي هو أصل المصائب في البلاد و اللي هو اللي ما يخليش التوانسة عندهم أمل في المستقبل.
منوال تنمية هو الحد من الظلم المسلط على بعض الفئات و بعض الجهات. منوال التنمية هو العدل
منوال التنمية هو فهم عقلية التونسي و بناء عقد اجتماعي يربط بين التوانسة الكل و يبني حلم مشترك
منوال تنمية هو منوال تنمية الجهات بطريقة متكاملة و هي قبل كل شيء رؤيا و نظرة بعيدة و هو منوال متاع تهيئة عمرانية تخلق الثروة و تحسن البيئة متاع العيش
منوال تنمية هو إنتاج و خدمة و عرق و جهد و تعب
و هو في نفس الوقت جهد للناس الكل و مدخول محترم و لائق للناس الكل، كل واحد حسب جهدو و مجهودو.
منوال تنمية هو في الأخير فرصة باش الأولاد يطلعو خير من والديهم و يعيشو خير منهم.
منوال التنمية هو اللي يحدد دور الدولة الي هي اليوم ما خلاتش طاقات ها البلاد تعبر و تتفجر.

هذاكا علاش ما زلنا ما تفاهمناش على أي منوال تنمية نحبو.

Dans la même catégorie