2018-03-06 نشرت في
مقداد السهيلي يوجّه رسالة لأمينة فاخت: ''خوذ كلام اللي يبكيك ''
وجه نقيب الموسيقيين مقداد سهيلي رسالة للفنانة أمينة فاخت اثر حوارها مع الهادي زعيم في برنامج 360 درجة.
و جاءت رسالة مقداد السهيلي في شكل تدوينة على صفحته الرسمية بالفايسبوك ذكرها فيها بتعاونهما الفني و لامها على جحودها تجاه الملحنين التونسيين.
بكل لطف :
كنت نتفرج في الحوار اللي عملو الهادي زعيم مع الفنانة أمينة فاخت ... نحب بالمناسبة نهنيها عالرجوع والنجاح والجمهور والفرحة ..... وكي العادة وهي تعرف والناس الكل تعرف اللي انا نقول كلمتي قدام أكبر جبار في الأرض ومانخاف كان من ربي ... وفمة اشكون شاهد عليا كيف قلت كلمتي بكل قوة وصراحة قدام بن علي وغيرو .... اللي نحب نقولو للفنانة هاذي هو راو فمة فنانين مهمين جدا في البلاد ويعرفوا الموسيقى مليح ويعرفوا إمكانياتك ويوزنوها بالغرام معناها هوما الحكم الصحيح موش الجمهور اللي يحب جوك وخروجاتك وهبلاتك الحلوة ... معناها فمة ناس تعرفك فنيا اكثر ماللي انت تعرف نفسك ... وهذا شيء كان ماتعرفوش يلزمك تؤمن بيه وتعرفو .... الشيء اللي ماعجبنيش هو طريقة حديثك عالملحنين التوانسة ... قلت اللي انت عطيتهم فرصة ... عطيت فرصة للفنان عبدالرحمان العيادي وللفنان سمير العقربي ... لكن في الأخير عرفت اللي مافماش ملحنين كبار في تونس !!!!! هذا كلام فيه برشة تعالي وغرور مبالغ فيه على خاطر لو عكست لأصبت لأنو الفنان عبد الرحمان العيادي هو اللي لحنلك أغنية - أنت مرادي - اللي كانت الإنطلاقة الفنية الحقيقية متاعك وتباركالله غنيتها حتى قريب تولي عشانا وفطورنا ... والفنان سمير العقربي خدم زادة هو معاك برشة وآخر مالحنلك - سلطان حبك - اللي كسرت الدنيا وحبوها الناس ...
والفنان محمد الماجري والشاعر حاتم القيزاني في أغنية - طير الحمام - والفنان عبد الحكيم بلقايد في أغنية - أنا مالأيام - هاذم ناس ماتنجمش تكون انت عطيتهم فرصة اما هوما اعطاوك أكبر فرصة في حياتك باش وليت - DIVA - كيما يعيطولك توة ... أقل مايمكن تشكرهم وتنحني قدامهم قدر فيهم وفي خدماتهم باش وليت تدلل وتتجبد وتطلب في عشرات الملاين ... وهوما خذاو منك الفتفات ... موش تدور وجهك وتعتبر نفسك ضيعت معاهم برشة وقت ... معناها حقك مشيت لمصر وإلا لبنان !!!! هانا نسمعوا في خدمتهم ... سلعة بايتة وملفقة .... تلاحينهم ولات كي البروموسبور 1X2 .. وماك سمعتنا غنايتك الجديدة - سلطانة - بصراحة أقل بياسر ملي عملتوا مع اللي ذكرتهملك وأقل بياسر مالغناية اللي عملتهالك - أنا عندي دليل - بشهادة أهل الذكر ... ولذا ياأمينة راك بنتنا ونحبوك ... والعين عمرها ماتعلى عالحاجب ... ولوكان مانحبوك مانقولولك الكلام هذا ... وخوذ كلام اللي يبكيك ... ماتاخوش كلام اللي يضحكك ... ويتنوفق عليك ... ويلحسلك .
